Living Hope Calendar 2010

Living Hope Ministry chuan kum danga a lo tih tawh thin angin kum 2010 atan Calendar a siam chu a ti chhuak leh ta a. Tun tum hian mimal hnenah man tlawm te a zawrh chhuah a ni a, hei hi tlawmngaia min leisak tute zawng zawng hnenah lawmthu kan sawi a ni.

Living Hope Ministry-ah hian man tlawm taka thisen, zun leh ek te exam theih a ni a, eng hunah pawh inthlahrung lo taka tih theih a ni. Tin, Doctor pawh athlawna rawn nghal mai tur kan nei bawk. Nurse thiam takin ruihhlo avanga pan leh hliam neite a thlawnin a tuam sak thei reng bawk.

Taksa, Rilru leh Thlarau damna mamawhtu apiang tan pan theih kan ni a, mamawh tan Counselling kan neihpui thei reng bawk. I nunah harsatna i nei a, midang hriat loha tanpuina mamawh i nih chuan phone 09862389181-ah pawh min rawn be pawp thei ang. HIV/AIDS avanga harsatna i nei a nih pawhin Thisen Test tura lo buatsaih che kan ti thei a, thurawn i mamawh a nih pawhini tan kan inhawng reng a ni.

Overdose avanga thihna pumpelh nan OD an awm velleh rang taka min rawn hriattir hman chuan damdawi hmangin OD kan sawngbawl thei bawk a ni. I tan leh i thiante tan tanpuitu nih kan inpeih a, i mamawhna min rawn hriattir rawh le...

Innei Ta

Kan thawktu Tv. Laltanpuia Chawngthu chuan a lungdumtu tak Nl. Lalbiaknii chu nupui atan July 3, 2009 1:00pm khan Vaivakawn Kohhran Biak Inah a nei ta.

Office Thar

July 1, 2009 atang khan Living Hope Ministry chuan Office thar nuam tak kan DIC hlui zawk nena inzawmin a luah ta a. DIC hlui zawk hi CLINIC (athlawna inentirna hmun atan buatsaih mek a ni) atan hman a ni ang. Tunah chuan hna pawh kan thawk sawt deuh sawt thawh turah kan inngai a ni.
He kan Office thar Pathian hnena hlanna leh ICFAI University Tripura atanga internship rawn ti mi 14 te lawmna leh kan Staff pahnih thawkzui tawh lo tur thlahna ni pahfawmin zanriah kan kilho nghal a a ni.

Laboratory Unit

Living Hope Ministry-ah LABORATORY a awm a!!

Hun engemaw chen atanga kan lo nghahhlelh em em chu kan lo nei ve ta reng mai. Malsawmna thar min petu Pathian fakin awm se, Living Hope pawh midang tan Malsawmna a nih zel theih nan kan Laboratory hi tangkai taka hman kan beisei a ni.

Living Hope Ministry

Counselling Cum Drop In Centre

VB-26 Liannguri Building, Vaivakawn: Aizawl

Ph: 0389-2305165 www.livinghopeaizawl.com

Clinic & Laboratory

Test Rate@LHM Others

1. Urine R.E Rs. 40.00 Rs. 50.00

2. Anti HCV Rs. 230.00 Rs. 300.00

3. HBs Ag Rs. 120.00 Rs. 150.00

4. Hb Rs. 30.00 Rs. 50.00

5. TLC, DLC Rs. 40.00 Rs. 50.00

6. ESR Rs. 20.00 Rs. 30.00

7. Stool R/E Rs. 40.00 Rs. 50.00

8. Widal Rs. 80.00 Rs. 100.00

9. Blood Sugar Rs. 40.00 Rs. 50.00

10. Mantoux Test Rs. 50.00 Rs. 80.00

11. Platelet Rs. 50.00 Rs. 80.00

12. Blood Group Rs. 30.00 Rs. 50.00

13. B.T & C.T Rs. 50.00 Rs. 60.00

14. Lipid Profile Rs. 600.00 Rs. 650.00

15. R.F.T Rs. 150.00 Rs. 200.00

16. L.F.T Rs. 750.00 Rs. 850.00

17. Sodium (Na) Rs. 200.00 Rs. 250.00

18. Potasium (K) Rs. 200.00 Rs. 250.00

19. Uric Acid Rs. 80.00 Rs. 100.00

20. Acid Phosphatate Rs. 200.00 Rs. 250.00

21. Amylase Rs. 200.00 Rs. 250.00

22. CRP Rs. 120.00 Rs. 150.00

23. ASO Rs. 120.00 Rs. 150.00

24. RA Factor Rs. 120.00 Rs. 150.00

25. Syphilis Test Rs. 80.00 Rs. 100.00

Mitthi

Vaivakawna kan nau Darthuami (Nutei) kum 30 chu hun engemaw chen damlova a awm hnuin May 23, 2009 zing lam dar 5:25 khan Mitliam avangin kan lo then ta. A thih ni chawhnu lam hian Vaivakawn thlanmualah vui liam nghal a ni.

Nutei hi a damloh lai hian an in lamah pawh kan Outreach Worker te leh Peer Educator ten an tlawh thin a, hlim takin an inkawm thin a ni. Inlamah hun engemaw chen enkawl a ni a, Civil Hospital lamah te pawh a han lut chho leh thin a, a lo chhuak ve leh mai a. Chuti maia kal thut tur chuan kan la ring phal chiah lova. Mahse a natna hian a taksaah thu a nei lian zawk ta hle a, he khawvela han chelh reng theih ni lovin chatuan ram min lo pan san ta a ni.

Living Hope Ministry chuan a kalsan a chhungte Pathianin thlamuanin awmpui se tih chu kan tawngtaina a ni.

ICFAI Tech Team nen Outreach Tan dawn ta

ICFAI Tech zirlai 14 rual te nen June 1, 2009 atanga field work nei turin kan thawktute an in buatsaih mek a, hna thawh dan tur pawh May 29, 2009 Weekly Review Meeting-ah an rel a ni.
Hetih lai hian Mizoram SACS atanga kan Fund dawn thin chu kan la dang lova, Detail Costing pawh a thar siam tura ruahman a ni a, chu pawh chu kan la hmu thei rih lova, Project Extension angin April thla atang khan kan la kal zel rih a, hna lian tham leh hma lak hleih theih lohin min la siam a ni.
ICFAI Tech Tripura-a zirlaite hi Mizo deuh vek an ni a, Mizo tawnga biak theih deuh vek an ni. Kar riat chhung an cham dawn a, karkhatna-ah hian In House Training mumal takin an nei phawt a, chumi hnuin DIC leh Field-ah hna an thawk tawh dawn a ni. Hetiang hun hi kan tawn vawikhatna a ni a, tih that loh palh pawh kan hlau ve hle a, tawngtai mite min lo tawngtai sak turin kan ngen e.

Living Hope-ah ICFAI Tripura Student Internship

ICFAI University Agartala, Tripura-a B.Tech zirlai mi 14 te chuan Internship programme nei turin Living Hope Ministry May 25, 2009 hian an lo thleng a. He Internship Programme hian July ni 18, 2009 thleng a awh ang. Hetiang Programme hi Living Hope Ministry chuan a vawi khat hmanna a la ni a, rawngbawlna midangte nena zau zawka thawhhona Programme tha tak niin a hria a, lawmawm a ti hle a ni.

Heng University Student te hi a tam zawk chu Mizoram lam mi an ni a, an hming leh address chu hetiang hi a ni:

C. SAWIKHUMA, Kolasib C/o Chanmari West
ZAMUANA, Salem Veng
VANLALCHHUANMAWIA, Serchhip C/o Bethlehem
LALENGMAWIA RALTE, Chaltlang Mualveng
LALHMACHHUANA, Bethlehem
ARON LALTIAMHLENA, Melthum
JOSUA LALNUNKIMA, Melthum
F. LALRUATFELA, Ramhlun ‘S’
VANLALREMLIANA, Vaivakawn
VANLALHRIATPUII, Ramhlun ‘S’
GARY NGURSANGZELA, Aizawl Venglai
ALBERT L. HMAR, Chhinga Veng
JOSIAH L. KOMPA, New Saiha C/o Khatla
CINGSAWNCIIN HATZAW, Bongaigaon, Assam C/o Ramhlun 'S'

Heng zirlai te hian May 25 atangin Living Hope Ministry-ah hian Internship Programme hi an hmang tan nghal a, Project Manager chuan heng zirlai mi 14 (mipa 12 leh hmeichhia 2) te hi an hnathawh dan leh Project Kalpui dan tlangpui ni khat ni hian a hrilh hlawm a ni. Kar riat (8 Weeks) an cham chhung hian Project Sites paruk-ah placement an nei kual hlawm dawn a, NGO ten eng ang takin nge hna an thawh tih chu an en tur ber a ni dawn a ni. Living Hope Ministry chuan heng zirlaite hi tha tak leh tluang taka an hna an thawh theih nan duhsakna a hlan a ni.

LPS Pro Fight in DIC ah hmun chang

Tunlai hian LPS Vision chuan Promotional Fight Boxing chu an ti a lar hle mai a, kan Drop In Center ti ti ber a ni ta. Kan thawktute leh Community ten Theme song hi an duh bon top. Nula hote pawhin an duh hle a, a hla thu hriat kim loh kan neih hlawm avangin an rawn request angin hei kan han tarlang e.

LPS PRO FIGHT THEME SONG

A RUH NO NO CHHUAKAH

Mipa leh mipa chu inngur chher chher mai tur

Ngur chher chher mai tur

Chak zawk awm a ngai Hey… huai zawk awm a ngai tlat

Man leh man Bon leh bon ka rin leh ka rin

Zei takin fair takin confi takin

Ready for fair, ready for box, ready for ready for moveeee

A ruh no no A ruh no no chhuakah chhuakah chhuakah

Mipa leh mipa chu inveh them them mai tur,

Veh them them mai tur

Chak zawk awm a ngai Hey Champion zawn a ngai tlat

Hrat leh hrat, Hrang leh hrang, ka rin leh ka rin

Ngan takin, fair takin, confi takin

Ready for fair, ready for box, ready for ready for moveeee

A ruh no no A ruh no no chhuakah chhuakah chhuakah

Mipa leh mipa chu innuai miah miah mai tur

Nuai miah miah mai tur

Chungnung zawk awm a ngai, Luck zawk awm a ngai tlat

Ngan leh ngan, Khal leh khal, ka rin leh ka rin

Huai takin, khal takin, namai lo takin

Ready for fair, ready for box, ready for ready for moveeee

A ruh no no A ruh no no chhuakah chhuakah chhuakah

He hmunah hian, helai hmunah hian

Dawihzep tan, mi mai mai tan

Hlau leh turte tan, hmun a awm lo, in tan hmun a awm lo

Mi tawrawt rorum tan hian hliam a khat fate tan

Thisen huai te tan chauh hmun a awmmm…..

Maenga'n thil tha a hmu

Bible chuan Nupui hmu chuan thil tha a hmu a ni a ti a, Living Hope Ministry-a kan Accountant hmasa ber, Tv. R. Lalengliana (Maenga) chuan thil tha a hmu a ni.

Tv. Maenga hi kum 2006 tawp lam vel atang khan World Vision India-ah hna a hmuh avangin Tripura lamah a hna thawhlai kalsanin min liam san a, tun thlengin chu lamah chuan a bur ta ngar ngar mai a. Aizawl a lo haw chang chuan Living Hope Office tlawh lovin a awm ngai meuh lo. Tun tuma a lo haw erawh min rawn hre chang dawn tawh lo emaw kan ti a, thil tha a hmu tlat a!! Mahse Special Invitation Card kengin a duh tak, a nupui tur Venghlui nula Lalrinfeli, Tripura-a Missionary thawklai nen an rawn lang ta hlawl mai a! Anni pahnih hian May 29, 2009 (Friday) chawhnu Dar 2:00-ah Model Veng Biak In hawnga inneih an tum a, kan lawmpui hle a ni. He inneih hmang tur hian kan ha te pawh kan lo tuai hriam tan a ni.

Candle Lighting Memorial Service

Kumin hian kum dang pawha an lo tih thin tawh angin PNM bultumin 4th Mizoram Candle Lighting Memorial Service chu May 22, 2009 11:30am-2:15pm hian Chanmari YMA Hall-ah hman a ni leh dawn.

He hunah hian tupui atan “Together we are the solution” tih chu hman a ni dawn a. Opening Prayer Most Rev. Stephan Rotluanga (Bishop of Aizawl) in hun a hmang ang a, Health Minister Pu Lalrinliana Sailo chu Khuallian (Chief Guest) niin Dr. K. Ropari, Project Director MSACS chu Khualzahawm (Guest of Honour) a ni thung ang. Thusawitu dang pawh an awm nual dawn a, zaithiam tak tak zai ngaihthlak tur a awm bawk ang. Tin, Jerrys Inc., ten Documentary Film an buatsaih chu thlirho a ni ang. HIV/AIDS avanga chatuan ram pan ta te hriatrengna atan kalkhawm zawng zawngin bati (Candle) chit vek tura buatsaih a ni a, hetih chhung hian Zonunmawii solo chu ngaihthlak tur a ni dawn ani.

Hetianga hun hman thin hian HIV/AIDS Patient te kan endanah danglamna min siamin kan hria em? A tangkaina leh mipuite tana a hlawkna sawitur hria kan awm em? Nge HIV Positive te kan ti tlangnel mai mai zawk.

HIV Positive hi kan ramah hian mi sang thum chuang an hmu chhuak tawh a, mi 164 te chuan chiang takin a thihpui tawh bawk a. Tunah hian hriat mang loh leh ngaihsak hlawh lo tak tak an inphum ru teuh in a rin theih a. Chutih laiin a ruk tea inhria, mahse sawichhuak ngam si lo, midang pawh kai reng an awm a rinawm bawk a. Hengte hi NGO kuta dah mai tur nge, Mizo mipui hian kan ngaihvenin kan theih ang angin helama thawktute kan tanpui ve thin ang? A han comment teh u le....

Mazawni'n Pasal Nei

Mission for Social Reforms (MSR) Project Manager Nl. Vanlalzawnpuii chuan May 21, 2009 chawhnu dar 2:00 khan Aizawl, Electric Vengthlang Kohhran Biak Inah Pasal a nei a, kan lawmpuiin fanau maltluan chawia nupa kawp chawi rem taka an awm kan duhsak hle a ni.

Nl. Mazawni hi Social Work lama tui tak leh mi inhmang peih tak a ni a, a hnaah hian a tui em em a, Media lamah pawh mite hriat a hlawh chho hle a, Pi Vanramchhuangi (Ruatfela Nu) te nen pawh nasa takin an thawkho thin a ni. Tuikual-a MSR Drop In Centre-ah Project Manager hna a thawk mek a, pasal tha tak mai a nei hi a hun lo pawh kan ti tawh chiah lova, kan lawmpui hle a ni.

Website nei dawn ta

Hun engemaw chen atanga kan lo thlir tawh, Living Hope Ministry hminga website neih chu mi thahnemngai te avangin kan nei thei ve dawn ta a. Hemi atana min puitute hming han tarlan kan duh rualin chiangkuang deuh zawka an thlalak te nen la tih kan tum dawn a, tunah chuan kan lo hriat tlan atan a thawiin kan han sawi thuak chauh dawn a ni.

Living Hope Ministry-a kan Secretary Pu V. Laltlanliana chuan he kan website siamna tur atan hian ngaihtuahna min senpui nasa hle a, a hnathawhna lam atangin Vanlal Chhuanga nen inbe fuhin hma an la ta nghal a. Chhuanga hian a thianpa Lalchhandama Upa Rokamlova fapa nen theihtawp min chhuahpui a, a bik takin an ni pahnih chungah hian kan lawm hle a, a tul tur ang zawng zawng min ngaihtuah pui vek a, lawmthu kan sawi mawlh mawlh a ni.

May 21, 2009 khan www.livinghopeaizawl.com tih chu a hmasa ber atan tih nun chhin a ni ta a, officiala puanzar a la nih loh bakah la developed chhoh zel tura ruahman a ni a, enchhinna ang deuh chauha tih a la ni rih. Pthian zarah hun remchanga la tlangzarh pawh tum tur a la ni ang.

STAFF OUTING Programme

Living Hope Ministry Project Staff- te chuan May 15, 2009 Friday khan Lengpui lui-ah Outing hun an hmang a. Hetah hian harsatna bik (Damlohna) avanga Staff pahnih kal theilo tih loh chu kan kal kim a. He hunah hian intih hlimna leh hun thawl tha tak thaw k han lakna atana hun hman a ni. Kum tluanin buai takin mahni thawhna mual mualah kan buai em em hlawm a, hetianga a huhova hlim tlang taka pawlh buaitu awm lova hun kan hmang thei hi lawmawm kan tiin tha kan ti tlang hle a ni. He lui nuam takah hian rawng te bawlin tlaiah zanriah kilho nghal a ni a, khaw thim hmain mahni in kan thleng leh hman vek a ni.

Misualin DIC rawk

May 14, 2009 zing dar 9 vela kan DIC hawng tur Outreach Worker Lalnunseii chuan Misual hnuhma a hmu.
DIC Kawngkapui hi Tala lian ve deuh taka kalh a ni a, nimahsela May 14 zingah hian mi tutih hriat loh ten an lo karchhia a ni tih hmuh a ni. Tala kar chhiat nan hian Vaivakawn Bazar-a "Bazar Vawng Fai Rawh" tih an tarna thir (Rod) chu a frame chawpin an hmang a, a sir kilkhatah an lo hnutchhiah nghe nghe a ni. Inchhung bungrua zingah Gas Stove double leh Cylinder bur khat chu a lo awm lova. A rang thei ang berin Vaivakawn Police hriattir an ni a, FIR te kan ziak nghal a, Police lam hian theih tawp chhuaha zawn an tum nghal a ni.

He misual vek ningeia ngaih chu May 18 zan khan lut nawn lehin DIC kawngkapui Tala pahniha kalh chu a karchhe leh a, hemi tum hian LG company Television set chu an lachhuak leh a, mi pakhat mai nilovin mi pahnih emaw tal chu an chet dan atang hian niin an lang a ni. Hei pawh hi kan hriat velleh May ni 19 zingah Vaivakawn Police hriattir leh nghal an ni.

Living Hope Ministry hi mi thahnemngai tak tak ten an neih ang ang te vawm khawmin Dressing bungrua chhuan sova tih thinghlim nan Gas pawh hi kan mamawh ani tih a hmun ngeia min hnuhpuitu Pu Lalngurliana Sailo te chhungin min pek (Donate) a ni a. Hun engemaw chen kan hmang a, chhun thingpui lum nan leh Dressing bungrua chhum so nan kan hmang ber a.

Hmanrua kan neih loh em avangin leh hmun khat maia heng thil chi hnih hi kan tih thin avangin hmanraw chhuansonaa thingpui lum mai chang kan nei dawn dawn ta mai a. Hei hi hriselna atan thil tha lo thei tak a nih avangin a hrang hlaka Dressing bungrua chhumna tur leh thingpui lumna neih tha kan ti hle a. Kan Board member Nl. Rosalyn C. Vanlalruati pa Pu RC Daniela chuan phal takin a Gas Cylinder thla tam tak chhung min hman hawh tir a. NGO-in sum tlem tlema kan khawl chu Gas Cylinder lei nan kan hmang ta a, hemi hnu hian Gas Bur mi ta kan hawh pawh kan pe ve thei chauh a ni. Hetianga harsa taka Gas bur pahnih kan neih hnu lawk hian Misual tu tih hriat lohvin kan DIC kawng ka chu karchhiain min lo ruk chhuah sak tawh a. Hei ni nikum lam tawh a ni a. Hetiang a lo nih tak avang hian kan in luahna neitu Pi Liannguri chuan an mahni hmanlai Gas bur pakhat chu min hawh tir a, Gas stove pawh thawktuten pawisa an lo khawl khawm hmangin kan lei leh ta ngawt mai a. Hetianga mi Gas bur hawha kan kal mek lai hian tunah Gas Bur leh Stove chu DIC kawngka karchhia bawkin min lo ruk sak leh ta a ni.

Hetianga Ruihhlo avanga harsatna tuar, Damdawiin leh inenkawlna hmun danga sum seng pawha an enkawl that duh mang lohte a thlawna an hliam enkawl saka duat taka kan buaipui chung pawha harsatna min siam sak fotu hian ngaihtuah chiangmang lova thil a ti a nih a rinawm a. Hetiang ti lo theilo dinhmuna a ding hi tawngtaipui a ngai hle ang tih a rinawm.

Pathian malsawmna tam tak an dawng a, "LALPAN a pe a, LALPAN a la leh ta a; LALPA hming chu fakin awm rawh se," tia Joba'n Pathian a fak anga keini pawhin Pathian kan fak ve theih a ve duhawm em!!!

Glow Signboard Thar Thliin len thlu

Tunlai hian thli na tak taka tleh thut thut a ching a, kan Office awmna lai phei hi chu thli a na zual hle a ni. Living Hope Ministry Signboard thar; Tv. Lalthanzawna, TELELINK neitu Zarkawt-in min donate chu hun rei vak pawh kan la tar hmain May 10 (Pathianni) zana thli na tak thleh khan a len thlu a, vanneih thlak takin engmah chhia a awm lo hlauh a ni. Thli tleh hun kan la hmachhawn dawn chauh avang leh tuna kan Office luah lai hi thla thar maia kan insawn dawn avangin tar lohin kan dah leh rih a, Office thar luah hun ah remchang lai leh langsar thei ang bera tar tura ruahman mek a ni. He Signboard hi Steel body veka siam a ni a, a chhungah hian tubelight pathum dah a ni a, zanah pawh a eng tha hle a ni. Hetiang thil man tam tak tur min donate tu Tv. Tetea chungah kan lawm hle a ni.

Thawktu Damlo

F. Lalremthanga, Hunthar Venga kan Peer Educator thawklai chu a thal (Malpui bul)-ah bawk ruh tak a awm a, hei hi Civil Hospital-ah an lo zai sak a, hnai tam tak an sawr chhuak a, tunah an mahni in lamah a inenkawl mek a, a natna hi ngaihtuah awm a ni hran lova, mahse hna han thawhpui ngam a la nih loh avangin a hna tlemin a khaihlak deuh a, a that chhuah leh thuai kan duhsak a, i tawngtaipui ang u.

Damdawiin atangin James Lalrama chhuak

Peer Counselor James Lalrama chu a malpui dinglam ruh tliak avanga hun engemaw chen Civil Hospital-a a awm hnuin May 11, 2009 khan an mahni chenna Hunthar Vengah a lo chhuak leh ta. A lo chhuah tlai hian Upa H. Ronghaka, Project Director leh Alan Lalmuanpuia, Project Manager te chuan an inah hian an tlawh nghal a, damlo enna atan Rs. 500/- chu Livingh Hope Ministry hmingin an hlan. James Lalrama hian tawngtaina a dawng nual a, a dam pawh a dam chak viau in a hriat a, a lawmawm hle a ni. Kan tawngtainaah i hre reng ang u.

Networking Hlawhtling takin Hmang

April 27, 2009 zan khan Chawnpui Vengthlang KTP te nen tangkawpin Networking Programme Cum Awareness Program hlawhtling tkin kan hmang ho. He hunah hian Mizorama zaithiam lar berte zinga mi Zoramchhani leh Lallawmawma ten he hun hi min rawn hman pui a, tleirawl (TEENAGERS) puala he hun hi hman a ni.

Mi za chuang an lo pungkhawm thei a, hunserh Chawnpui Vengthlang KTP lamin an hmang a, chumi hnu lamah zai leh lam (Musical Dance) hmuhnawm tak kan thlirho va. Living Hope lam atangin Project Manager in hun a hmang a, Teenagers tana hriat tur pawimawh tak tak a sawi a, a thusawi karlakah hian zaithiam ten kalkhawm ho chu an awi reng bawk.

He hunah hian HIV/AIDS laka inven a pawimawh zia te sawi lan a ni a, HIV Positive Lalbiakhliri'n HIV hrik a kai dan leh ama chanchin a sawi chuan ngaithlatute beng a verh hle a, kalkhawm ho zinga engemaw zat chuan HIV Positive an hmuh vawikhatna a ni nghe nghe. Zawhna leh chhanna hun hawn a ni a, mahse zawt tur lam an ding tha vak lova, zan dar 9 velah he hun hlimawm leh danglam tak hi kan hmang zo ta a ni.

Malpui ruh tliak

Kan Peer Counselor Tv. James Lalrama chu April 25,2009 khan accident a tawh avangin a malpui dinglam ruh a titliak palh a, Civil Hospital-ah enkawl mek a ni. May 2, 2009 khan zai theih a ni chauh a, darkar thum vel lai an zai a, rin ai takin Doctor te hian zai harsa an ti a ni awm e, X-ray an ti leh anga, chumi result a zir chuan zai that leh pawh a ngai maithei niawmin an sawi.

Hetia kan Peer Counselor a damloh avang hian hun engemaw chen chu a hna pawh a thawk thei dawn lo ni awm tak a ni a, LHM Board ten a chungchang hi remchang hmasaah an la rel dawn a nih hmel. Kan tawngtaina lamah i hre reng ang u.

Audit hmachhawn leh ta

May thla kan chungkai a, Accounts lam pawh audit a lo hun leh ta reng mai a. MSACS lam chuan Audit tur hian May 4, 2009 hian an Office-ah min kova, hetah hian kan Accountant chu lehkha pawimawh te nen Audit hmachhawn turin a kal. Tun tumah hian thla ruk chung audit tur a ni dawn a, a hmalam thla ruk chu Auditors te hian an lo audit fel vek tawh a ni. Heng auditors te hi Gauwhati lam atang lokal an ni awm e.

Mahruaii'n Min Vei

Nl. Lalhruaitluangi Sailo, Evangelical Fellowship of India hnuaia chanchinbu lama hna thawka New Delhi a awm mek chuan kan chanchin te ngaihvenin min vei thin hle tih thu kan dawng a, lawmawm kan ti hle. Nl. Mahruaii hi Living Hope Ministry dinchhuaktute zinga mi a nih bakah Secretary hna chelh hmasa bertu a ni. Kum 2007 June vel atang khan Pathian kohna chhangin a hna thawhlai kalsanin mahni inhlawh chawpa Pathian rawngbawl turin MAURI kaltlangin a pen chhuak a. A rawngbawlna atan a pawimawih dawn tih hria in Journalism lam a zir a, tha takin a pass a, tunah hian EFI chanchinbu AIMS chu enkawlin New Delhi-ah a awm mek a ni.
April 20,2009 chawhma lam khan min rawn phone a tum a, mahse phone chiankuan loh deuh avangin kan inbe hleithei ta lova, min vei rengtu leh kan Ministry tana thahnem ngai taka min tawngtai saktu kan nei hi vannei kan inti hle a, Lalpan a rawngbawlna malsawm zel se kan duhsak hle a ni.

Annual General Meeting cum Annual Review Meeting

April 18, 2009 khan Living Hope Ministry Annual General Meeting cum Annual Review Meeting chu Vaivakawn Presbyterian Gospel Centenary Hall-ah hman a ni. He hunah hian Living Hope Ministry bul tantirh lai atanga member pawimawh tak tak an lo tel thei a, a bik takin Pu Ngurliana Sailo lo tel chuan he meeting hi a ti phuisui hle a ni. Living Hope Ministry-a Accountant hna lo thawk tawh Pu Darchhawntluanga pawh phur takin a lo tel thei a, meeting recording secretary atan hman a ni nghe nghe a ni. Tin, Living Hope Ministry-a Outreach Worker lo thawk tawh thin Nl. Laldinpuii, tuna Arunachal Pradesh-a Synod Missionary a kal ta pawh a nu Pi Lalremsangi a lo tel thei bawk. Board lam pawh an kim tha hle.

He meeting ah hian Report hrang hrang ngaihthlak a ni a, Ministry Secretary Pu V. Laltlanliana'n Secretary Report a pe a, Financial Report te, Project Area report leh Annual Report te ngaihthlak a ni. Hei bakah hian fuihna thu tha tak tak ngaihthlak a ni a, Pathian hnena in hlanna leh Tawngtairualna hun te hman a ni bawk. Upa Lalhluna, Senior Adviser Rawngbawlna dang avanga Manipur lama zinbo tih loh chu Board Member te pawh an kal kim a ni. Rev. CM Zalenthanga Senior Adviser, Chanmari chu Jarkhand Field-ah kal tura thlawhna ticket la fel vek tawh a ni a, mahse khuain a zir tak loh avangin an flight cancelled a ni a, he meeting-a hunserh hmang tura ruat a nihna pawh a rawn ti hlawhtling leh thei a, lawmawm kan ti hle a ni.
Tlai dar 4:30 velah meeting hi zawh fel a ni a, Lalpa Tawngtaina chu Living Hope tihdan thin angin inkai kuala sawi rual a ni. Zanriah tuihnai tak fatu ruat bik ten an lo siam chu meeting zawh hian kilho a ni.

Peer Educator Thar lak anni ta

Living Hope Ministry Peer Educator thawk turin mipa pakhat leh hmeichhia pakhat lak thar an ni a. Heng Peer Educator tharte hian April 13, 2009 atang khan an hna thar an zawm a, In House Training an nei nghal a ni.
Peer Educator atana lak tharte hi Nl. Lalnunpuii, Edenthar leh Tv. H. Lalchhanhima Kanan te an ni a, anmahni veng ve ve ah hna an thawk nghal dawn a ni. Edentharah hian Peer Educator Pi Lalrosiami chu thawklai mek a ni a, Nl. Lalnunpuii nen hian an thawk dun dawn a ni. Outreach Worker Nl. Lalnunseii chu kum thar April thla atang hian Kanan Bial vawng turin a insawn dawn bawk a ni. Kanan bialtu Outreach Worker Tv. Laltanpuia Chawngthu chuan Edenthar hi a bial ve thung dawn a, tluang tak leh tha taka an thawh theih kan duhsak a, Veng mipuite pawh heng kan thawktute thiam taka lo thawhpui turin kan beisei a ni.
Kanan Vengah chuan Tv. H. Lalchhanhima leh Tv. PC Lalthanmawia ten Peer Educator hna hi an thawk dawn a, kan bial chhung veng dangah chuan thawktu inthlak an awm lem lo a ni.

In House Training

Project Year 2009-2010 atan a hmasaber ni turin April 13-15, 2009 chhung hian Living Hope Ministry TI Project Staff zawng zawng tan 3 Day In House Training buatsaih a ni dawn a. Hemi chhung hian Outreach leh hna tul dang chu remchan dan ang zela thawh mai tur a ni dawn a ni. He training ah hian Resource atan Project Staff te hman an ni dawn a, hetiang hian Training Schedule pawh siam a ni.

DAY I

Time	Topic	Resource Person	Remarks
10:00 – 10:15	Devotion
10:15 – 10:30	Introduction Session	Alan Muanpuia, Project Manager
10:30 – 11:30	NACP III	Alan Muanpuia, P M
11:30 – 12:30	DIC – Importance & Role	Lalnunseii, ORW
12:30 – 1:00	LUNCH BREAK
1:00 – 2:30	Staff Roles & Responsibilities	Lalthanpuii, Counsellor
2:30 – 4:00	Harm Reduction & Sobriety	Lalruatkima, Peer Counselor
4:00 – 4:30	REVIEW & DISCUSSION

DAY II

Time	Topic	Resource Person	Remarks
10:00 – 10:15	Devotion
10:15 – 10:30	Recap
10:30 – 11:30	NSEP & OD Management	James Lalrama, Peer Counselor
11:30 – 12:30	Outreach & Program Planning	Laltanpuia Chawngthu, ORW
12:30 – 1:00	LUNCH BREAK
1:00 – 2:30	STI & Abscess Management	Lalrinmawii Ralte, Nurse
2:30 – 4:00	Detail costing & Finance	H. Laltanpuia, Accountant
4:00 – 4:30	REVIEW & DISCUSSION

DAY III

Time	Topic	Resource Person	Remarks
10:00 – 10:15	Devotion
10:15 – 10:30	Recap
10:30 – 11:30	Condom Promotion	H. Rosangpuii, ORW
11:30 – 12:30	Counseling	Lalthanpuii. Counsellor
12:30 – 1:00	LUNCH BREAK
1:00 – 2:30	BCC	Alan Muanpuia, P M
2:30 – 4:00	Documentation with Formats	Lalnunseii, ORW
4:00 – 4:30	CLOSING & CERTIFICATE DISTRIBUTION