Living Hope Ministry Board Meeting

Living Hope Ministry Board Meeting February 14, 2009 khan Living Hope Ministry Office-ah neih a ni a. Chairman leh Project Director ni bawk Upa H. Ronghakan Meeting hi a kaihruai. Hemi hunah hian Work Plan leh Work Report Project Manager buatsaih thlirho a ni a, pawm ngaite pawm a ni. Living Hope Ministry Brochure leh leaflet chungchang pawh sawi a ni a, copy 3000 ve ve siam tura ruahman a ni a, Board Secretary lo bawh zui atan dah a ni. Ministry Website chungchang pawh sawiho a niin Board Secretary buaipui atan dah a ni. Office leh DIC atan in lian zawk luah theih dan tur chungchang sawiho a niin zir chian leh deuh hnua thu tlukna siam tura dah a ni.

Project Staff te tana Staff Benefit Scheme siam tha tih a ni a, Gratuity System kalpui tha tih a ni a, hemi atan hian Rs. 1,00,000.00 (Nuaihkhat) UTI Mutual Fund-a dah dan kawng zawn nise tih chu remtih a ni. Hei bakah hian Regular Staff ten LIC Policy an lak duh chuan an Policy lak atan thlatina an pawisa pek tur atanga 25% chu NGO fund atangin tum sak ve nise tih a ni bawk.

Ministry Constitution sap tawnga siam chu en that leh a ni a, siam that ngai te siam thain March 2009 atanga hman tan tura ruahman a ni a, Board Secretary-in lo bawhzui se tih a ni.

Membership Drive neih chungchang sawi thar leh a ni a, 2009-2010 hi hruaitu thlan thar loh kum a ni a, membership drive erawh neih thar leh nise tia rel a ni bawk.

Community Events Nei Dawn

Living Hope Ministry hnuaia target community te tan Community Events puitham deuh taka buatsaih tum a ni a. A hmun atan CHAWNGVAWR RESORT a ni ang a, a hun chu February 20, 2009 (Zirtawp Ni) a ni ang. (HeResort thar hi ruahman ang chuan February 19 zan hian Mizoram Chief Minister Pu Lal Thanhawla'n Official-a hawnna a nei dawn nghe nghe a ni. )
Community Events huna tel tur hian Project Staff te chuan thahnem ngai takin KP an sawm khawm mek. 'Mizoram State Day' lawmna denchhena he community events hman tur hi Living Hope Ministry chuan phur takin a thlir lawk a, he hun remchangah hian a duh apiang tan HIV hrik pai leh pai loh hriat nghal theih nan Mobile ICTC pawh a hmunah an rawn in chhawp hnai dawn a ni. Hei bakah hian IDUs te tan a thlawna inentirna hun ruahman a ni a, Doctor pahnih an vil reng dawn bawk a ni. Tin tunlai zaithiam lar tak takin hun an hmang dawn bawk a, chung zingah chuan : Johan H. Lalmalsawma, Mami Varte, C. Sanga, leh Mawitei te chuan he hun an hman theih tur an tichiang tawh a ni. Tlai lamah zanriah tuihnai tak buatsaih nghal tur a ni bawk.

TRAINING NEI

Mizoram Social Defense and Redhabilitation Board hnuaia State Training and Resource Centre (STRC) huaihawt Training January thla tawp lam atang khan neih chhoh mek zel a ni a. Hemi ah hian kan Ministry hnuaia thawktute pawhin Training an la hlawm a. Outreach Worker, Project Manager, Project Director, NGO Functionaries, Counselor leh Doctor ten training an nei a ni.

Livingh Hope Ministry-ah Mithar

Living Hope Ministry-a kan thawktute mimal harsatna avanga an hna thawh zawm thei lo te leh thawk laite hna chanpual siam rem avangin thawktu thar Peer Educator pali leh Outreach Worker pakhat kan neih belh leh ta. Peer Educator atan hian heng a hnuai a ite hi lak thar an ni:-
1. Benny Lalfakmawia, Chawnpui
2. F. Lalremthanga, Hunthar Veng
3. Ludy Ramthansangi, Hunthar Veng
4. H. Lalhlimpuia, Zotlang
Heng mi pali bakah hian Outreach Worker hna thawk turin Panel list-a kan lo dah tawh sa, Nl. H. Rosangpuii, Central Jail Veng chu lak thar a ni bawk a, heng thawktu tharte hian February thla bul atangin an hna an zawm nghal a ni.